Mimali na raka?
February 14, 2009mukilalai siapa raka tonna to sisola mallai-lai biccu. Siula-ula ngngola lalang mareqmak. To manjo massikola tang massapatu tang massandala. To makaritutu ke to mane anjo massikola saba matakuki maruta. Yake to sulemo, biasa bawang dibungka to bajunta namane to siulaula. Biasa duka to sireba ruta, na maruta ngasang to sullaraq ta.
Mukilalai siapa raka, yake to rampo mo jio banua. Biasa bawang dikaluqpei to kumande. To pada millumpaq ri nokko salu. To sibale jiong salu. Siula mennorong lulako ju mai. Tae to mataku jio Punna Salu. Yake to kape mo si bale, to siparrangang minnukkung. Benda-benda kaning masai minnukkung ya mitu kaminang maparrang.
Mukilalai sia pa raka to sola ta biasa mereccu ke sikiparrangang minnukkung. Biasa bawang naboko-boko kendek minnawa, na mane minnukkung sule na nasanga mi kalena juara. Biasa duka si kode-kodei to sassintaq. Na migora mi nasanga kalena juara. Jamang-jamang pada to di sanga nepotisme lako tee.
Ee Puang deng siapa raka dikka solaku ngkilalai to jamang-jamang ki wattung ki beccu siapa. Pakilalai kasi to solaku. Nasaba melosantaq na kasi sirupang-rupang
